भैरहवा, फागुन १६     रुपन्देही–४ मा प्रतिनिधिसभा निर्वाचनको सरगर्मी बढ्दै जाँदा राजनीतिक बहस र अड्कलबाजी तीव्र बनेको छ। गाउँदेखि सहरसम्म चुनावी चर्चा चलिरहेका बेला जनमत पार्टीका उम्मेदवार भोपेन्द्र प्रसाद यादव आत्मविश्वाससहित प्रचारमा सक्रिय देखिनुभएको छ। यादवले यसपटकको चुनावी प्रतिस्पर्धा मुख्यतः जनमत पार्टी र नेपाली काँग्रेसबीच सीमित रहने दाबी गर्नुभएको छ। “मुख्य प्रतिस्पर्धा काँग्रेससँगै हुन्छ,” उहाँले सञ्चारकर्मीसँगको संवादमा उल्लेख गर्नुभयो। उहाँका अनुसार अन्य दलहरूको प्रभाव यस क्षेत्रमा उल्लेखनीय नदेखिएको उहाँको मूल्यांकन छ।

आफूलाई किसानको प्रतिनिधि मात्र होइन, किसानकै सन्तानका रूपमा प्रस्तुत गर्दै यादवले कृषि, श्रम र निम्न आय वर्गका मुद्दालाई आफ्नो प्राथमिक एजेन्डा बनाइरहनुभएको छ। जनमत पार्टीले गरिब तथा श्रमिकमुखी नीतिमार्फत आर्थिक सुधार र सामाजिक न्याय सुनिश्चित गर्ने लक्ष्य राखेको उहाँको भनाइ छ। २०७९ सालको निर्वाचनमा करिब १६ हजार मत प्राप्त गरेको स्मरण गर्दै यादवले यसपटक मतदातामा परिवर्तनको चाहना अझ प्रबल देखिएको दाबी गर्नुभयो। “परिवर्तनको चाहना बढेको छ, र त्यो भरोसा हाम्रो पक्षमा केन्द्रित भइरहेको अनुभव गरिरहेको छु,” उहाँले भन्नुभयो।

निर्वाचन परिणाम आउन अझ केही दिन बाँकी रहे पनि यादवको दाबी र सक्रिय अभियानले रुपन्देही–४ को चुनावी प्रतिस्पर्धालाई थप चासोको विषय बनाएको छ।