भैरहवा, फागुन ११      जनता समाजवादी पार्टी नेपाल का अध्यक्ष उपेन्द्र यादव ले मुलुकमा देखिएको राजनीतिक जटिलताको समाधानका लागि संविधान संशोधन आवश्यक रहेको बताएका छन्। रूपन्देहीको भैरहवामा आयोजित पत्रकार भेटघाटमा बोल्दै उनले वर्तमान संविधानले मधेशी, जनजाति, दलित तथा अन्य उत्पीडित समुदायका सवाललाई पूर्ण रूपमा सम्बोधन गर्न नसकेको दाबी गरे।

उनले सङ्घीय व्यवस्थालाई प्रभावकारी बनाउन पहिचानका आधारमा प्रदेशको सीमाङ्कन पुनरावलोकन गर्नुपर्ने आवश्यकता औंल्याए। साथै, प्रत्यक्ष निर्वाचित कार्यकारी राष्ट्रपतिको व्यवस्था र पूर्ण समानुपातिक निर्वाचन प्रणाली अवलम्बन नगरेसम्म राजनीतिक स्थिरता कायम हुन नसक्ने उनको तर्क थियो। अध्यक्ष यादवले गौतम बुद्ध अन्तर्राष्ट्रिय विमानस्थल लाई पूर्ण क्षमतामा सञ्चालनमा ल्याउन सरकार गम्भीर हुनुपर्ने बताए। विमानस्थल सञ्चालन प्रभावकारी बनाउन कूटनीतिक पहल र प्राविधिक व्यवस्थापन सुदृढ गर्नुपर्नेमा उनले जोड दिए।

उनले आफ्नो पार्टीले स्थापना कालदेखि नै मधेशका मुद्दा उठाउँदै आएको स्मरण गराउँदै उत्पीडित समुदायका अधिकार सुनिश्चित गर्न पार्टी प्रतिबद्ध रहेको बताए।