रुपन्देही, फागुन २१       रुपन्देही निर्वाचन क्षेत्र नम्बर–२ मा मतदाताको उल्लेख्य सहभागितासहित मतदान जारी रहेको छ। विभिन्न मतदान केन्द्रहरूमा बिहानदेखि नै मतदाताको भीड देखिएको छ भने मतदाताहरू उत्साहपूर्वक मतदान प्रक्रियामा सहभागी भइरहेका छन्। प्राप्त जानकारीअनुसार दिउँसो ३ बजेसम्म करिब ५१ प्रतिशत मतदान सम्पन्न भएको छ। अधिकांश मतदान केन्द्रमा मतदाताहरू अनुशासित रूपमा लाइनमा बसेर आफ्नो मताधिकार प्रयोग गरिरहेका छन्। यस क्षेत्रको निर्वाचनमा मुख्य प्रतिस्पर्धा नेपाली कांग्रेस, नेकपा एमाले र राष्ट्रिय स्वतन्त्र पार्टी बीच हुने अनुमान गरिएको छ।

कांग्रेसका तर्फबाट बुटवल क्षेत्रका प्रतिष्ठित व्यवसायी चुन्नु प्रसाद पौडेल उम्मेदवार रहेका छन्। स्थानीय स्तरमा पार्टी संगठन र व्यवसायी समुदायमा उनको राम्रो प्रभाव रहेको मतदाताहरू बताउँछन्। त्यसैगरी एमालेका उम्मेदवार विष्णु पौडेल पूर्व उपप्रधानमन्त्री तथा अर्थमन्त्रीसमेत भइसकेका अनुभवी नेता हुन्। यस क्षेत्रबाट पटक–पटक निर्वाचित भई उच्च पदमा पुगिसकेका पौडेलले आफ्नो पुरानो राजनीतिक प्रभाव कायम राख्न सक्ने कि नसक्ने भन्ने विषयलाई मतदाताले चासोका साथ हेरिरहेका छन्।

राष्ट्रिय स्वतन्त्र पार्टीका तर्फबाट सुलभ खरेल उम्मेदवार रहेका छन्। पछिल्लो समय “पुराना दलभन्दा नयाँ विकल्प चाहिन्छ” भन्ने आवाज बढिरहेको सन्दर्भमा उनको उम्मेदवारीलाई पनि महत्वका साथ हेरिएको छ। स्वतन्त्र उम्मेदवार निकोलस भुसाल ले रास्वपाका उम्मेदवारलाई समर्थन गरेको खबरले पनि चुनावी समीकरणमा थप चासो बढाएको छ। मतदानको समय समाप्त हुन केही घण्टा मात्र बाँकी रहेकाले उम्मेदवारहरू अन्तिम समयमा मतदातालाई आकर्षित गर्ने प्रयासमा छन्। मतदान सम्पन्न भएसँगै सुरु हुने मतगणनाले यस क्षेत्रको चुनावी परिणाम र राजनीतिक समीकरण स्पष्ट पार्ने अपेक्षा गरिएको छ।